Job Satisfaction

Lungawina hi hlimna min petu a ni a,hlimna hi lungawina kan neih avanga lo awm a ni.Lungawina leh thuawihna pawh hi a in kawp tlat bawk.Lungawina hi hriselna atan a tha a,thihpui khawp hial natna veitu pawh a lungawi tlat chuan hnehna a chang thin.Mi rethei leh kutdawhte pawh an lungawi tlat chuan an hlim mai a ni.Mi hausa leh ropuite pawh lungawina an neih loh chuan a hausakna leh finnate chu an lungaihna belhchhahtu mai a ni fo.
Enghna thawk mi pawh ni ila,kan hnaah lungawi taka kan thawh chuan hlawhtlinna a awm thin.Lungawilohna hian helna a hring a,helna chuan tharum thawhna leh thihna,pawisawilo thlenga an nunna laksak duhna a thlen thin.A chunga thupui ka han tarlan tak ang khian mahni hna a lungawina hi a va pawimawh em ! Thil reng reng a thim zawnga thlir tlat chi 'pessimist' an tihte hi thil a eng zawnga thlir chi 'optimist' an tihte ai hian a tlangpui thuin an damreilo zawk an ti.Sumdawng kan ni emaw,sawrkar hnathawk kan ni emaw,Pathian rawngbawltu kan ni emaw,kan hlawhtlinna thuruk chu mahni hna a lungawina hi a ni.
Mahni hna a lungawina tih hian hmasawn pawh tum tawh chuanglo a a ngai renga awm mai tumna lungawina erawh a kawklo tih hria ila.Hmasawn zel tuma beih hi mitinte tihtur a ni.Midangte tana tangkai zawk leh hmantlak zawk ni tura beih zel hi Pathian min siam chhante zinga pakhat chu a ni reng reng.Amaherawhchu kan nihna phaktawk theuha a hun lai zela Pathianin min dahnaah hian lungawina kan nei tur a ni ang.Sawrkar hmasa tawp lamah khan zahthlak khawpin nawrhna thlarau khan Zoram min han hrut mai kha ania ! In thik kualna leh duhamna khan kan zahna(nervous bawm a keh) leh Mizo ze mawi zawng zawng kha a ei zo a,mahni thatna tur anih chuan midangte tawrh chu pawisa miahlo ang mai khan kan zia kan han chhuah mai kha a nia ! Mi tlemte te hlawkna kha mi tamberte tan tawrhna thlentu a ni tih reng kan ngaihtuah phal tawh lo niin a lang.

Pathian rawngbawltu Puithiamte leh missionaryte ngei pawhin hei hi kan hriatchian a pawimawh thinin ka hria.Pathianin min koh ang ngeiin kan duhna takin rawngbawlnaah kan lut a.Tuna kan nihna theuhah hian kan hlim em,nge sawi nawi tur zawng reng mai leh lungawina reng neiloin hna kan thawk zawk ? Midangte entawn tlak ni tur leh tisa leh thlaraua malsawmna ni tur a thawktu kanni tih kan theihnghilh ta mai em ? Khawvelmi ni a kan hriatte hian an khawvel tichhetuah min lo puh ve reng maithei a sin. Eiru leh fello a kan ngaihte tih theih angah,an dinhmunah hian dingin,an tarmit hi bun chhin ta ila,kan rintlak meuh ange maw chu le ? He zawhna hi rawngbawltuten hetiang hian chhang ta ila: Aw rintlak tehreng ang,a chhan chu ka tui ber leh nih ka nih chak em em rawngbawltu chu Pathian zara ka lo nih ve avang leh chu hnaah chuan lungawina ka neih avangin.Pathian ngaihsak hi lungawina tel zawngin hlawkna nasa tak ani tih hi ka hriatchian avangin tiin,hei hian midangte nun ah nghawng tha tak a nei ngei ang.He rilru Krista pawhin neise min tih ngei hi rawngbawltu mai nilo,kristian zawng zawngte hian kan neih chuan kan hnathawhna theuhah,ngawirengin emaw tawng chhuakin emaw,kawngkhat talin emaw kawng dangin emaw rah tha tak a chhuah ngei ang.